طريقة دراستكم مادة الإنكليزي الى طلاب الخارجي 2026 (التمهيدي)
- بالبداية اطمئنوا من ناحية اسئلة مادة انكليزي الخارجي 2026 أسئلته واضحه ونصًا من الكتاب وتگدرون تتأكدون من الأسئلة الوزارية السابقة، بس مطلوب منك تستثمر وقتك بصورة صحيحة وتراجع كل شيء، لأن المادة درخية فضروري تتراجع كلها.
- راح تقسم الإنكليزي إلى خمسة أقسام وحسب هيكلية الأسئلة الوزارية:
1⃣ قطع الكتاب أو ما تسمى (القطع الاستيعابية).. تقرأها وحدها لكل الوحدات، طبعًا راح تجيك بالسؤال الأول فرع B وحصتها 10 درجات، ستة نقاط تجاوب خمسة وتترك وحدة ولكل نقطة درجتين.
2⃣ قواعد الكتاب.. أيضًا تقرأها وحدها لكل الوحدات، راح تشوفها بالسؤال الثاني من الأسئلة وحصتها 30 درجة، 20 منها على فرع A اللي هو 12 نقطة قواعد ومطلوب تجاوب على 10 نقاط فقط وتترك 2، والـ10 الباقية من الـ30 هي على فرع B اللي هو أيضًا يخص القواعد.
3⃣ التوصيلات والإسقاطات والتعريفات والإملاء وهاي الحبشكلات كلها راح تكون موجوده في السؤال الثالث اللي يتألف من 3 فروع A و B و C وأيضًا يفضل تقرأها وحدها لكل يونتات الكتاب.
4⃣ الأدب، وبالأدب عندك كاتبة اسمها (كاثرين مانسفيلد)، كل شيء يخصها مطلوب (حياتها وقصتها)، أما الكاتب محمد خضير هذا كل شيء بي محذوف (حياته وقصته) والأدب عليه 10 درجات وموقعه السؤال الرابع، تجيك 6 نقاط تترك وحدة، أسئلة الأدب ممكن تجي على شكل تكملة أو أسئلة أو فد نقطة منهن صح وخطأ وهكذا.
5⃣ الإنشاء، هذا معروف بالنسبة الكم يعني عندك 10 إنشاءات بالكتاب كله، يجي منهن اثنين تجاوب على واحد فقط ودرجته 20، وما أنصحك تعتمد على مرشحات كائن مَن يكون بالإنشاء لأن درجته 20 وتكسر الظهر فكلش حرامات تجازف بيها.
اسئلة التمهيدي مادة الانكليزي 2026 خطوات الدراسة
- الأفضل تبلش حاليًا بالقواعد تراجعه كله مال كل الكتاب لأنه ينفهم وما ينسي بسهولة، وبعدين تبلش بالأمور الحفظية من قطع وأدب وغيرها.
- حاول تخصصلك وقت تشوف بي فيديو يخص القطعة الخارجية وكيفية الإجابة عنها، حتى تتعرف على بعض الملاحظات اللي تخص القطعة الخارجية وتگدر تجيب بيها أعلى درجة ممكنة حتى لو كنت ضعيف بالترجمة.. القطعة الخارجية حصتها 10 درجات وموقعها السؤال الأول فرع A.